· "...و آغاجلار اؤزگورلویو دوشونورلر
· و ساچاقلار ناچاقلاردان یوللارینی آییرمیشلار..."
دؤرد قوشوق، دؤرد چئویری
شعر :نسیم جعفری
چئویرمن : کیان خیاو
۱
سندن یالنیز
بیر داغ اوره ییمده قالمیش
و اؤلومه آچیلان
قاپالی بیر پنجره.
قورخورام قورخورام
قارانلیقدان،
آچیق-ساچیق دانیشان پنجره لردن.
دیزلرینی قوجاسان
ال ال اوستونه قویاسان
و آمانسیز آغلاییشلار
گؤزلرینی قوجالدا؛
بؤیوک بیر آغری دیر!
گؤیله ال-یاخا اولاسان
و هئچ بیر اولدوز
دیشاری چیخماغا حاضیرلاشمایا
و سن اؤز کؤکونون ده رینلییینده
یالنیز بیر اولدوزا
راضی بولونمایاسان
و گؤیونون
هانکی کیبریتله آیدینلاشاجاغینی بیلمه یه سن؛
بؤیوک بیر آغری دیر!
سانکی قارانلیق منیم وئرانلیغیمدیر
سانکی گره ک کولک واختسیز اسه یمیش
و ایسته مه دن پنجره لری قاپایایمیش
و گئجه
گونشین قوجاغیندان قاییدایمیش
و من اولدوزلاریمی ایتیره یمیشم.
بیلمیرم نئجه
اؤلومون اپریمیش بؤلومو
آغزیما تؤکولدو
و من نئجه
یوخلوغون آجیلیغیندان ایچدیم
و مندن بیر آیاق ایزی
هئچ بیر سال داشدا قالمادی
بیلمیرم نه اولدو
آنسیزین گؤیلریم یئتیم قالدی
و یاشام بئشیییمی ییرقالاماق اوچون
داها بیر ال قالمادی.
آ...ه!
داها زامان گئجیکیبدیر
و واخت یوخ
گلدییین یوللاری گئتمه لی اولدون.
بوراسی اؤلوم قییی سی
اؤلولر دیریلری بوراخان یئر.
...........................................................................................
2)
"منی آینالارا تاپشیر"
و ایشته آینالار
گئدیشدن گؤز گؤتورمورلر
سانکی زامانی گلمیش
آردیمجا سو سپسن
و قورآن آلتیندا کئچیرسن گره ک!
آغاجین قارا گؤزلریندن دوشن یئمیشین
داها گنج یارپاقلاردان بیر پایی یوخ.
او یئتگین اینانجلا داها
قارانلیق بوداقلارا قاییتمایاجاق.
آینالارین سنه دال چئویردییی
بیر یئره یئتیشمیشسن.
و آغاجلار اؤزگورلویو دوشونورلر
و ساچاقلار ناچاقلاردان یوللارینی آییرمیشلار.
وعد ائدیلمیش واختدان اؤنجه
بوداقلارینی بوراخماق؛
بو کال یئمیشلرین ائلچیلییی دیر:
اوستونده هئچ بیر قوش یووا قورمایان
نه دنسیز آغاجلار اوسته قالماقدان
باشی آشاغا دوشمه نین یئی اولدوغونو
یاخشیجا بیلن یئمیشلر.
زامانی گلمیش
آینالارا تاپشیرا بیلرسن منی!
اؤیله یئنیجه یئتیشمیش بیر یئمیش بئله
اوستونده پاسلانا بیلر بو تورپاغین
سویوق بیر یئرینده.
اؤزله ین بیر گؤی اوزونون چاغیریشی یلا
بوراخیلمیش بیر آجونا آیاق قویموشام
و دوشله دیکلریمله قابار باسمیش
قارانلیق قوناقلیغینا گئدیرم.
........................................................................................................
3)
"بوندان قادینجاسینا..."
بال دیر
و ایستی سود
سنین اؤپوشلرین.
یاناقلاریمین یوردونا
هئگئمونلوق ائدن ایمپراتورلار.
و گولومسه مه لرین آراندیر سنین
نرگیزلری گونشه آغیز آچمیش
جئیرانلاری دوغ-دوغوزدورماق ایشینده.
بوندان داها قادینجاسینا دئیه بیلمه رم:
اؤیله اؤپ منی
قانیندا بیر یوسون ترپه نیشی یله
یوکله نیب بویلو قالیم!....
..............................................................................................
4)
"سندن و مندن"
سندن یالنیز
اوزوقارالیق قالار.
مندن
سنین سوموکلرینی
دؤنوشومه داریخدیراجاق بیر آینا!
چئویردی: کیان خیاو 27/6/1389
